Аэроғарыш саласының жетекші ғалымдары салалық ғылыми журнал құруды талқылады
3.06.25
«Ұлттық ғарыштық зерттеулер және технологиялар орталығы» АҚ (ҰҒЗТО) «Аэроғарыштық зерттеулерге арналған ғылыми журнал: құру және даму алгоритмі» атты дөңгелек үстел өткізді. Іс-шара гибридті форматта өтті және Қазақстан Республикасы цифрлық даму, инновациялар және аэроғарыш өнеркәсібі министрлігі Аэроғарыш комитетінің ведомстволық бағынысты ғылыми ұйымдарының өкілдерін, сондай-ақ жетекші отандық университеттердің шақырылған сарапшыларын жинады.
Дөңгелек үстел жұмысы барысында аэроғарыштық технологиялар және сабақтас ғылымдар саласындағы қазақстандық және халықаралық зерттеулердің нәтижелерін жариялау үшін кәсіби платформа болуға арналған ұлттық ғылыми журналды дайындау мен іске қосудың негізгі кезеңдері егжей-тегжейлі қарастырылды. Қатысушылар келесілерді талқылады:
- басылым тұжырымдамасын қалыптастыру және басылымдардың мақсатты бағыттарын анықтау;
- редакциялық алқаны қалыптастыру тәртібі;
- басылымды БАҚ мәртебесінде мемлекеттік тіркеудің құқықтық және техникалық аспектілері;
- халықаралық идентификаторларды алу талаптары мен рәсімдері.
Авторларға қойылатын талаптарды, рецензиялау стандарттарын және COPE халықаралық ұсынымдары бойынша жарияланымдардың этикалық нормаларын сақтауды қамтитын редакциялық саясатты әзірлеуге ерекше назар аударылды.
Талқылау қорытындысы бойынша журналдың ықтимал атауларының алдын ала тізбесі бекітілді, жарияланымдардың негізгі бағыттары айқындалды және редакциялық алқаның құрамы қаралды.
Жобаның байланыс тұлғасы PhD докторы Мейірбеков Моһаммед.
ҰҒЗТО барлық қатысушылар мен шақырылған сарапшыларға белсенді жұмысы, сындарлы ұсыныстары және аэроғарыштық зерттеулер саласында сапалы және бәсекеге қабілетті қазақстандық ғылыми журнал құру жолында одан әрі ынтымақтастыққа дайындығы үшін алғыс білдіреді.
